Осиёи МарказӣСиёсат

Вокунишҳои сахти бархе корбарони қирғиз ба муроҷиати видеоии муовини Эмомалӣ Раҳмон

 14:51, 14 майМуаллиф: Asia-Plus

Хайринисо Юсуфӣ муовини Эмомалӣ Раҳмон дар ҳизби ҳокими Халқии демкоратӣ баъди ду ҳафтаи даргириҳои марзӣ ба мардуми қирғиз муроҷиат кард.

“Кӣ бояд дар ҳамоҳангӣ ва сулҳ зиндагӣ кунад? Магар қирғизҳо буданд, ки бо миномиёт ба мардуми осоиштаи тоҷик ҳамла карданд??? Қирғизҳо буданд, ки мисли малахҳо ҳамаи моликияти тоҷикҳоро аз гулдон то чорво ғорат карданд, кӯдакону занони тоҷикро куштанд??? Агар воқеан чунин мебуд, он гоҳ медидем, ки ӯ чӣ мегуфт. Эҳеее, бедор шав!!! Ба мардуми худат муроҷиат кун!!! Сулҳхоҳ ёфтем!,- чунин вокуниш кардааст, як корбари Фейсбук аз Қирғизистон бо номи Миргуля Болотбекова ба муроҷиати видеоии Хайранисо Юсуфӣ муовини Эмомалӣ Раҳмон дар ҳизби ҳокими Халқии демократии Тоҷикистон.

Юсуфӣ се рӯз пеш дар як муроҷиатномаи видеоӣ ба мардуми қирғиз, ки дар Ютуб нашр шуд, даъват карда буд, ки бояд барои барқарории сулҳу созиш миёни мардумони Тоҷикистону Қирғизистон талош кард.

Юсуфӣ дар ин муроҷиат ба забонҳои русиву қирғизӣ мегӯяд, ки “мо дар таърихи чандинасраи ҳамсоядории нек санҷишҳои бисёреро пушти сар кардем ва аз ҳамдигар омӯхтем. Ҳар кадоме аз мо ҳамкорон, дӯстон, шиносҳо хуб ва хешу таборҳо дар кишвари ҳамсоя дорем. Дар ин рӯзҳо, дар ҳар ду кишвар бисёр гуфта мешавад, ки моро таърихи муштарак, равобити хешутаборӣ, фарҳанг ва дин ба ҳам мепайвандад. Мо имрӯз, муваззафем, ки муттаҳид шавем, иродаи нек нишон диҳем ва барои  сулҳу ҳамсоягии неку неруи созанда аз ҳар ду тараф талош кунем. Мардумони мо бояд дар сулҳ зиндагӣ кунанд”.

Ҳарчанд бархе аз корбарони шабакаҳои иҷтимоӣ ин муроҷиати Юсуфиро истиқбол кардаанд, вале аксари корбарони қирғиз ба он посухҳои хашине додаанд.

Аз ҷумла корбари дигаре бо номи Тоолос Абдулла: дар Ютуб зери ин видео навиштааст, ки “не, не, ин хел намешавад. Бояд дар сатҳи расмӣ узрхоҳӣ шавад ва ҳар чизеро ки дуздиданду сӯхтанд бояд барқарор кунанд. Он гоҳ мо фикр мекунем”.

Зери ин видео дар ютуб бисёре аз корбарон бо забони қирғизӣ суханҳои пасту баланде навишта ва ҷониби Тоҷикистонро дар сар задани низоҳои ахир гунаҳкор кардаанд.

Муроҷиати видеоии муовини ҳизби ҳокими ҲХДТ бо гузашти ду ҳафта аз  даргириҳои ахири Тоҷикистону Қирғизистон дар марзи вилоятҳои Суғду Исфара сурат мегирад.

Тибқи иттилои расмӣ дар ин даргириҳо аз ҷониби Тоҷикистон 19 нафар куштаву 87 кас захмӣ шуданд. Ҷониби Қирғизистон кушташудаҳои худро 36 ва шумори захмиёнро 186 нафар эълон кард.

Муроҷиати Юсуфӣ дар Тоҷикистон дар пасманзари мавҷи танқидҳое, ки дар онҳо гуфта мешуд чеҳраҳои расмиву сиёсии Тоҷикистон вобаста ба даргириҳои марзӣ изҳори назар намекунанд, хеле хуб истиқбол шуд.

Мақомоти Тоҷикистону Қирғизистон ҷонибҳои якдигарро барои оғози даргириҳои мусаллаҳона муттаҳам мекунанд. Даргириҳо рӯзи 28-уми апрел, пас аз он сар зад, ки Тоҷикистон мехост дар як обанбори муштарак бо номи “Главное” дурбини назоратӣ насб кунад ва ҷараёни тақсими обро назорат кунад. Аммо ин тасмими ҷониби Тоҷикистон бо мухолифати мардум ва низомиёни қирғиз рӯ ба рӯ шуд.

Related Articles

Шарҳи Шумо

Нишонаи электронии Шумо нашр нахоҳад шуд. Ҳошияҳои ҳатмӣ ишора шудаанд *